កិច្ចប្រជុំពង្រឹងគណៈកម្មាធិការក្នុងការតាមដាន និងពន្លឿនការអនុវត្តកម្មវិធីសកម្មភាពនៃ សន្និសីទអន្តរជាតិស្តីពីប្រជាជននិងអភិវឌ្ឍន៍ (ICPD)

    

    ខេត្តស្វាយរៀង៖ នាថ្ងៃពុធ ទី១៦ ខែកក្កដា ឆ្នាំ២០២៥ អគ្គលេខាធិការដ្ឋានប្រជាជននិងអភិវឌ្ឍន៍ បានសហការជាមួយមន្ទីរផែនការខេត្តស្វាយរៀង រៀបចំកិច្ចប្រជុំដ៏មានសារៈសំខាន់មួយរបស់គណៈកម្មាធិការប្រជាជននិងអភិវឌ្ឍន៍ខេត្តស្វាយរៀង។ កិច្ចប្រជុំនេះមានគោលបំណងចម្បងដើម្បីពង្រឹងគណៈកម្មាធិការក្នុងការតាមដាន និងពន្លឿនការអនុវត្តកម្មវិធីសកម្មភាពនៃ សន្និសីទអន្តរជាតិស្តីពីប្រជាជននិងអភិវឌ្ឍន៍ (ICPD)។

ដឹកនាំនិងចូលរួម គោលបំណងយុទ្ធសាស្ត្រនៃកិច្ចប្រជុំ

កិច្ចប្រជុំនេះបានប្រព្រឹត្តទៅក្រោមការដឹកនាំដ៏ខ្ពង់ខ្ពស់របស់៖

» ឯកឧត្តមបណ្ឌិត ប៉ូច ប៊ុណ្ណាក់ រដ្ឋលេខាធិការ និងជាអនុប្រធានអចិន្ត្រៃយ៍ គណៈកម្មាធិការជាតិជំរុញអនុវត្តកម្មវិធីសកម្មភាពរបស់សន្និសីទអន្តរជាតិស្តីពីប្រជាជននិងការអភិវឌ្ឍន៍ (គ.អ.ស.អ.ប.អ)។

» ឯកឧត្តម ជា ចាន់ទុំ អគ្គលេខាធិការ និងជាប្រធានលេខាធិការដ្ឋាន គ.អ.ស.អ.ប.អ។
» លោក រស់ ផារិទ្ធ អភិបាលរងខេត្តស្វាយរៀង។

ជាមួយគ្នានេះ កិច្ចប្រជុំក៏មានការអញ្ជើញចូលរួមពីសមាជិក សមាជិកាគណៈកម្មាធិការប្រជាជននិងអភិវឌ្ឍន៍ខេត្តស្វាយរៀងផងដែរ។

គោលបំណងនៃកិច្ចប្រជុំនេះ គឺដើម្បីពង្រឹងសមត្ថភាពរបស់គណៈកម្មាធិការប្រជាជននិងអភិវឌ្ឍន៍ខេត្តក្នុងការអនុវត្តតួនាទីរបស់ខ្លួនឱ្យកាន់តែមានប្រសិទ្ធភាព។ តាមរយៈការពិនិត្យឡើងវិញនូវវឌ្ឍនភាពនៃការអនុវត្តកម្មវិធីសកម្មភាពរបស់ ICPD កិច្ចប្រជុំបានផ្តោតលើការដោះស្រាយបញ្ហាប្រឈម និងស្វែងរកដំណោះស្រាយរួមគ្នាដើម្បីពន្លឿនការអនុវត្តការងារ។

សន្និសីទអន្តរជាតិស្តីពីប្រជាជននិងអភិវឌ្ឍន៍ (ICPD) គឺជាកិច្ចព្រមព្រៀងសកលមួយដែលផ្តោតលើការអភិវឌ្ឍប្រកបដោយនិរន្តរភាព និងការកែលម្អសុខុមាលភាពរបស់ប្រជាពលរដ្ឋ ជាពិសេសការលើកកម្ពស់សុខភាពបន្តពូជ ការអប់រំ និងសមភាពយេនឌ័រ។

ការរៀបចំកិច្ចប្រជុំនេះនៅថ្នាក់ខេត្តបានបង្ហាញពីការប្តេជ្ញាចិត្តរបស់រាជរដ្ឋាភិបាលក្នុងការអនុវត្តគោលនយោបាយថ្នាក់ជាតិឱ្យបានដល់ថ្នាក់មូលដ្ឋាន ដើម្បីធានាថាការអភិវឌ្ឍប្រកបដោយបរិយាបន្នពិតជាបានទៅដល់ប្រជាពលរដ្ឋគ្រប់រូប៕